हेल्मेट वापरणे खरोखरच सुरक्षितेसाठी फारच आवश्यक आहे. सर्वानी ते वापरलेच पाहिजे यात शंका नाही.
पण ते वापरण्याची जी सक्ती केली आहे त्याचे काही मजेशीर तोटे जे मला जाणवत आहेत ते खालील प्रमाणे.
१) दूध, ब्रेड, बिस्कीट अशा लहान सहान खरेदीला सकाळी सकाळी आंघोळ न करता टी-शर्ट, बर्मोडा वर हेल्मेट घालून जाणे
२) ऐन थंडीत सर्दीने गळणारे नाक मोटार सायकल चालवता हेल्मेट ची काच वर करून आत रुमाल कोंबून पुसणे किंवा गाळणाऱ्याला गळू द्यावे
३) बाहेर गावाहून येणाऱ्या पाहुण्याला बस स्टॅन्ड वरून आणायला जाताना एकतर त्याचासाठी घरातून एक्स्ट्रा हेल्मेट घेऊन जाणे किंवा त्याला येतानाच त्याचा स्वतःचा आणायला सांगणे
४) वाहन चालवताना डोक्यात खाज आलीच तर सहन करणे किंवा मानसिक समाधानासाठी हेल्मेटलाच खाजविणे
५) घरातील वयस्कर स्त्रिया आजी, आई व आत्या यांना महादेवाच्या दर्शनाला नेताना नऊवारीवर हेल्मेट घालावयास लावणे
६) बायकोला लग्नाला घेऊन जाताना तिची नवीन हेअर स्टाईल, डोक्यातील सुरेख बिंदी, क्लिपा, सुगंधी गजरा अशा अनेक गोष्टींना हेल्मेट मध्ये कोंबून घालणे. आणि तिथे पोहोचल्यावर हेल्मेट काढल्यावर तिच "मंजुलिका " रुप सहन करणे
७) बायकोच्या साडी / ड्रेस वर मॅचिंग हेल्मेट खरेदीचा मानसिक त्रास
८) आहेर मान पानात टॉवेल-टोपी ची जागा टॉवेल-हेल्मेट लवकरच घेणार
९) गावाकडील आजोबाना एकतर डोक्यावरचा फेटा मावेल इतका मोठा हेल्मेट बनवून घ्यावा लागेल किंवा दोन्ही आलटून पालटून वापरावा लागेल
१०) एखादी बाई वाहन चालवताना अचानक समोर वडीलधारी माणसे प्रकटल्यास चटकन हेल्मेटवर पदर घेऊन नमस्कार करणे
११) तुमचे स्वतःची दुचाकी नसेल आणि तुम्हाला वरचेवर इतरांच्या लिफ्ट ची गरज भासत असेल तर स्वतःचे एक हेल्मेट जवळ नेहमी बाळगा.
१२) सवयीने तुम्ही हेल्मेट घालून रस्त्यामधील मंदिरास नमस्कार केल्यास, नक्की कोण नमस्कार केले ते देवाला न कळल्याने तुम्ही आशिर्वादास मुकू शकता
अजून काही तुम्हाला सुचत असल्यास अभिप्राय द्यावेत
No comments:
Post a Comment